كان بودى
أرفع الليل اللى بينا
واخرَّج القمر
بعد البكا
من قيده يضوى
وانزع الشوك اللى ساكن فى الحلوق
كل زرعة وليها وقت
وكل وردة وليها ذوق
الصفوف الاولى قرب
وامتحان
من شوق لشوق
فتحة المنديل هروب
والرمال بتقول
تشوق
المواجهة دروس لطقس
والخرايط
فيها بحر
وفيها صحرا
والشادوف باحدف مياهه
للى يشرب قبل سكره
يقوم يفوق
جدد الزنار يزيدك
رتق الاحلام بروحه
والشقوق
هات ِدقة
ف وسط قلبك
وامتحنها
هيه صينى
واللا م اليابان طلوق
شمس ايه من غير ضياء
والنجوم من غير ليالى
زى وهم للغريق
كان بودى
أطلع الدنيا بسلالم
وانزل البحر بعروق
واصطفى وقت المحبة
ألف نحلة لزهر قلبى
والقطوف قنديل شروق
أحضن الوجد بضلوعى
وانتسب لسهيل ونرجس
والعمامة الخضرا تبنى
عالم من بروق
الجيوب الفاضية تعشق
واللى مليانة سباها
طفح زهد
ونار حريق
كان بودى
ألتحف بغزالة شاردة
تلتهمنى بضوعها أسكر
والمدى يبقى الصديق
كان بودى
درع عنتر
بين جيوش نعمان
بيسخر
مهر عبلة
ألف ناقة حمرا تقتل
مين يشوفها
كالعقيق
كان بودى
التدى يطرح زهوره
فوق نوافذى
تقوم تنقر
كل عصفورة جميلة
غنت الاحلام بشوق
ــــــــــــــــــــــ
نشوق : يشبه اى مخدر يتعاطى من الانف بعده عطاس شديد
يزيدك : ابو يزيد البسطانى المتصوف المحب
سهيل : نجم فىالسما شديد الاضاءة
الشاعر وحيد راغب
0 التعليقات:
إرسال تعليق